کوہاٹ میں ڈینگی کے کیسز میں خطرناک اضافہ، متاثرین کی تعداد 261 تک پہنچ گئی

ضلع کوہاٹ میں ڈینگی وائرس تیزی سے پھیل رہا ہے جس کے باعث شہریوں میں تشویش بڑھ گئی ہے۔ محکمہ صحت کوہاٹ کے سربراہ ڈاکٹر گل سید نے میڈیا سے گفتگو میں بتایا کہ اب تک ڈینگی کے مریضوں کی تعداد 261 تک جا پہنچی ہے۔ متاثرہ افراد کے علاج کے لیے اسپتالوں میں خصوصی وارڈز قائم کیے گئے ہیں۔

ڈاکٹر گل سید کے مطابق ڈینگی وائرس سے سب سے زیادہ متاثرہ علاقہ کوہاٹ تحصیل کی جرما یونین کونسل ہے، جہاں متعدد شہری اس مرض میں مبتلا ہوچکے ہیں۔ اسی طرح گمبٹ اور لاچی تحصیلوں میں بھی درجنوں افراد ڈینگی وائرس سے متاثر ہوئے ہیں جن کا علاج جاری ہے۔

محکمہ صحت کی ٹیمیں ان علاقوں میں سپرے مہم چلا رہی ہیں جہاں ڈینگی وائرس پھیلانے والے مچھر پائے گئے ہیں۔

ڈاکٹر گل سید نے عوام سے اپیل کی ہے کہ وہ صفائی کا خاص خیال رکھیں، گھروں کے اندر اور اردگرد موجود گندے پانی، کچرے اور گملوں کو صاف کریں تاکہ مچھر افزائش نہ کرسکیں۔ ان کے مطابق احتیاطی تدابیر پر عمل کر کے ڈینگی کے پھیلاؤ میں نمایاں کمی لائی جا سکتی ہے۔

Powered by Froala Editor